وجيه عزيز .... عبقرية الغناء فى الزمن الصعب (2

عمرك ركبت ال "توب سبن" اللى فى دريم بارك؟؟ اللى جرب يركبها أكيد مش ممكن ينسى الاحساس ده، عارف لما بتتطلع بيك فووووق فوووق اوى وبعدين تقف تستنى شوية كده .. الناس كلها واقفه متشعلقة فى الهوا بتبص على الدنيا كلها من فوق وخايفيين مش عارفين ايه اللى هايحصل..

وعارف بقى لما فجأة وبدون اى توقع تبتدى تنزل بسرعة شديدة جداً والناس كلها بتصرخ من المفاجأة .. عارف بقى الاحساس الفظيع اللى بيتولًد جوه الواحد فى اللحظة دى بالذات.. احساس انك سبت روحك فوق ونزلت من غيرها .... احساس كده انك طاير وان روحك ..... ايوة مرفرفة ... هوا ده فعلا التعبير المظبوط.

هوا دا بقى بالظبط الاحساس اللى فعلا بيتملكنى لما باسمع أغانى وجيه عزيز... احساس انى طايرة مع الكلام والألحان اللى بتنقلك لجو الأغنية سواء فرح او حزن قبل ما تسمع اى كلمة واحساس الشجن الحقيقى اللى يخطف الروح ويعيشك فى دنيا تانية بعيدة عن العالم اللى انت فيه.

عشان تسمع وجيه عزيز لازم تكون لوحدك فى مكان هادئ عشان تعرف تستمتع فى هدوء لكل كلمة وتستطعم جمال اللحن وعشان كمان بعد شوية كده هاتنسجم ومش هاتقدر تمسك نفسك وهتلاقى نفسك بتغنى معاه، فيفضل الوحدة عشان الازعاج اللى هاتسبب فيه للناس اللى حواليك بصوتك...

اما للمود بقى فمش مهم... يعنى لو دماغك مشغولة وعندك مشاكل أو بتفكر فى حاجة مضايقاك يبقى ده أنسب وقت تسمع فيه وجيه عزيز لأنك بعد ما تسمعه هتلاقى نفسك هادى ورايق على الآخر... ولو انت اصلا رايق من الأول يبقى خير وبركة ادخل عليه وانت مطمن انك هاتعيش فى حالة ملائكية من النشوة ويبقى زيادة الخير خيرين

هوووا هوا الفرح غالى ... شاااايف ليه القمر عالى ... وااالا قلبى دا شكله حزين
شكله حزين
راااجع راجع لكن غايب ... سااايب روحك كده سايب.. وااالا ماليان لقا وحنين
فاتت سنين

يعنى مثلا لو انت بتعيش قصة حب بس خايف.. حاسس انك مش اد الحب ده أو مستكتر حبيبك عليك او على نفسك احساس الحب اللى انت فيه

قوووولى الدمع ليه عاصى ... عااااشق والقلب مش ناسى... لاااااما آن الآوان حبيت
أنا حبيت

خايف من تصريحك بحبك وخايف من اللى جاى

ياااالى حلو الكلام فى عينيك... سااااكت ساكت مقولتش ليه... خاااايف نندم نقول يا ريت
نقول يا ريت

حاسس بالونس والألفه مع اللى بتحبه بس مش قادر تقوله

مااااشى وانتى الونس والزاد... دااايب والعشق ماله معاد ... شااايف فى عنيكى حبة ضى
ماله زى
يا ياااالى حلو الكلام فى عينيك... سااااكت وساكت مقولتش ليه... خاااايف نرجع نقول يا ريت
نقول يا ريت

ونفسك انك تعترف له بحبك وتعيش معاه اجمل ايام حياتك

مااااشى والدنيا شوق وحرير... هاااانت والا اللى باقى كتير... ياااالا نفرح سوا يومين
سوا يووومين

يبقى ضرورى تسمع أغنية "حاجات ومحتاجات" من شريط "ناقص حته" . الأغنية دويتو رائع بين وجيه عزيز والجميلة جيهان مغاورى – الحقيقة معنديش اى فكرة عن تاريخها الغنائى لكن حبيتها اوى من صوتها واحساسها- وهتلاقى قد ايه الأغنية قدرت تعبر ببراعة عن الفكرة دى واللحن المبهج الايقاعى الراقص – الجيتار مع الطبلة عاملين شغل جبار - اللى قدر انه يوصف احساس الشوق واللهفة والتردد وفرحة المصارحة بين الحبيبين.

www.wagihaziz.com

وبعد كده يجى ينزل بينا شوية لأرض الواقع و يتكلم عن حقيقة حياتنا اللى معظمنا بيعيشها كده زى ما تيجى.. من غير هدف ولا حلم ولا طموح...

قلت ابص فى المرايا يمكن اكون احلويت.. فضلت داير ابص مخلتش ولا مرايا فى البيت
فى الحمام.. فى الأوده.. فى دولاب.. أو متعلقة على الحيط
شوفت.... سكت شوية ... وبعدين اتخضيت...

وبعدين فجأة فى يوم من الأيام بنصحى ونتصدم بحقيقة عمرنا اللى ضاع بدون فايدة بس طبعا بعد ما يكون فات الأوان

معقول انا قضيت العمر ده كله زى ما رحت زى ما جيت
معقول انا عمرى ما فكرت .. ولا اتغيرت .. ولا حبيت

ولمانكتشف الحقيقة المرة دى نرجع نندم ونلوم نفسنا على عمرنا اللى ضاع فجأة من غير ما نحقق اى حاجة ليها قيمة عذابها فى فكرة اننا مش ممكن نقدر نعوضها وعشان كده بيتمنى لو انه مكناش اكتشف الحقيقة المؤلمه دى وفضل عايش كده زى ما هوا من غيرما يقاسى عذاب الندم

وازاى ساكت على روحى دا كله؟؟ وليه استنيت؟؟
يا ريتنى ما كان عندى مرايا.. ويا ريتنى ما بصيت

الكلام الرائع ده هو مضمون أغنية " المرايا" اللى بيغنيها كلها على نغمات العود صولو واللى قدر بيها انه ينقل احساس الشجن وخصوصا لما بيعلا الايقاع وطبقة الصوت فى الجزء التانى من الأغنيه.. واللى بيه بيعبر عن احساس الصدمة والفزع.

تابع