sadly feelings

الانسان ده كائن غريب فعلا .. اد ايه حالته النفسية ممكن تاثر على افكاره وتقلبها 180 درجة
يعنى لو حصلتله حاجة كويسة او حد قاله تعليق كويس يبقى مبسوط وافكاره كلها ايجابية ونفسه يعمل حاجات كتير.
ومجرد انه يمر بموقف مش لطيف او زعل مع حد تبتدى كل افكاره تنقلب ويدخل فى دائرة تفكير سلبى ويبقى مالوش نفس يعمل اى حاجة من اللى كان متحمس لها قبل كده
والاختلاف الوحيد اللى حصل هوا احساسه العام وحالته النفسية

ازاى الشخص ممكن يكون ايجابى طول الوقت ويقدر يتحكم فى مشاعره ومايخلهاش تأثر عليه فى افعاله .. يعنى بمعنى آخر يفصل بين مشاعره تجاه موقف أو شخص معين وبين بقيت حياته وافكاره وتصرفاته .
الحقيقة انى سمعت عن موضوع ال emotional intelligence او الذكاء الانفعالى وهوا انه ازاى زى ما بتتعلم تكون ذكى فى افكارك وتعرف تاخد القرار السليم فى الوقت المناسب انك تكون ذكى فى مشاعرك وتعرف تخرجها بالقدر المناسب وفى الوقت المناسب .. بس الحقيقة ما كنتش عارفه ان الموضوع تطبيقه صعب اوى كده وعايز درجة عالية جدا من التحكم فى النفس
********************
احساس عالى جدا بالضيق والحزن مسيطر عليا ... احساس صعب جدا انك تحس بشىء من الظلم.. وان الناس تفهمك غلط او متقدرش معنى شىء انت عملته بالنسبالى هو اقصى انواع الظلم خصوصا لما محدش بيحاول انه يدى نفسه فرصة للفهم كلهم شايفين انهم على حق وان هوا ده الصح الوحيد. بس ده ماينفعش والحقيقة انا مش عارفه اى حل واضح للموضوع ده ... ازاى انك فى اثناء الموقف تجنب احساسك وافكارك وتحاول تحط نفسك مكان اللى قدامك وتفهم هوا ليه عمل كده .. وليه الناس قصاد احساسها بنفسها والمشكلة اللى هيا فيها بيهون عليها احساس الاخرين اللى ممكن يضايقوا او يزعلوا. وبعدين لما تعاتبهم يرجعوا يزعلوا منك تانى ويقولولك دا كان غصب عنى وانت لازم تقدر الحالة اللى كنت فيها.

مين يقدر ومين يحس ومين يحكم... الحقيقة معرفش بس اللى انا عارفاه انى مش مبسوطة ومش مرتاحة

أول مرة

انا فى الاساس م الاشخاص اللى من صغرى اتعودت انى اكتب كل افكارى و خواطرى ومعظم المشاعر الى بامر بيها وبالاقى نفسى فى الكتابة اكتر من انى اتكلم مع حد
والحقيقة ان عندى مجلدات من كتر الحاجات الى كتبتها
كتاب قريته وعجبنى أحب اعلق عليه او حتى احتفظ لنفسى باجزاء منه عجبتنى فاكتبها لنفسى
فيلم شوفته وأثر فيا اوى احب اكتب احساسى عنه
موقف عدا عليا و اتعلمت منه حاجة او عاتبت نفسى على تصرف عملته
احساس حسيته مع حد وعشت معاه
كل دى اسباب وغيرها كتير كانت بتخلينى اجرى على الورقة والقلم وأحلى حاجة فى موضوع الكتابة انك لما ترجع لحاجة كتبتها زمان وتشوف انت كنت ازاى بتفكر وتقول يااااااااااااااه معقول دا حصل وانا عملت كده
أو ازاى انا كنت بافكر التفكير ده وتحس بالتغيير اللى حصلك
وارجع واقول انى بالرغم من انى عارفه عن فكرة البلوج على النت الا انى مفكرتش قبل كده انى اعملى واحد واحول كل كتاباتى من صفحات الاجندات والكراريس لصفحات النت
حاجة واحدة بس هيا اللى خلتنى افكر انى ابدأ بداية جديدة واخد القرار
انى احيانا باحس انى نفسى اوصل احساسى لغيرى وانى اشارك افكارى مع الناس
عشان كده عملت البلوج ولأول مرة هابتدى اتكلم مش بس مع نفسى لكن كمان مع غيرى
اتمنى ان البداية تكون كويسة ومفيدة وربنا يوفق
سلام