Sole Music

Wednesday, November 23, 2011

يوم فى الميدان


الاتنين 21 نوفمبر 2011


بدأ اليوم الصبح بأنى كنت خلاص هاموت وانزل التحرير. من ساعة ما بدأت الأحداث يوم السبت وأنا كنت مش قادرة استحمل فكرة القهر المفروض عليا وانى مش قادرة انزل من البيت.. امبارح الأحد اتحججت بالفعل بحجة لماما وقمت لبست ونزلت فعلا بس وأنا فى الطريق حصل الضرب الشديد جدا على المغرب على الناس اللى فى التحرير والغاز المكثف وكانت أول مرة يكون بالعنف ده .. كل أصدقائى اللى كانوا هناك وكنت مبلغاهم انى جاية كلمونى وصرخوا فيا بشكل عنيف: اوعى تيجى .. ارجعى .. وكانت النتيجة انى رجعت

يوم الاتنين بقى كنت بالف حوالين نفسى عايزة انزل بأى طريقة .. فى اليومين اللى فاتوا كنت بدأت بالفعل اجمع مطالب بأدوية كتيرة ومستلزمات طبية كانوا الناس بيبعتوها على النت وكمان عملت لسته بالحاجات الاحتياطية اللى محتاجه آخدها معايا .. مياة – كمامة – عصير – لين – شال كبير – الكاميرا عشان أوثق أى مشاهد – فلوس عشان الحاجات اللى هاشتريها – شاحن الموبايل عشان ميفصلش شحن ... كنت خلاص شبه مقررة انى لازم انزل لازم انزل وجهزت حجة لماما اقولها عشان اعرف انزل ... كلمت فى الأول دكتورة مها جعفر زميلتنا فى الحزب وكنا متفقين من ليلتها اننا نتقابل فى الحزب ونجيب معانا المساعدات الطبية ومن هناك نتوجه للميدان عن طريق الكورنيش من ناحية عمر مكرم عشان دا كان الطريق الآمن فى اليوم ده .. كلمتها واتفقنا نتقابل فى الحزب بعد ساعة وقالتلى على اننا محتاجين كمان نجيب بخاخات بلاستيك فاضية عشان نحضر محلول الميكوجيل (عبارة عن تلتين مياة وتلت ميكوجيل من الصيدلية وهوا دوا حموضة) ثبت معاجته لتأثير الغاز على الأنف والعين .. قالتلى انا حاولت ادور بس ملقتش ياريت تشوفى حواليكى .. قلتها اوك ..

بلغت ماما طبعا بالحجة واخدت نقاش منى شوية .. مشكلتى انى مش باعرف اكدب الكدب المفضوح ده .. فى الحوار بلاقى نفسى باسكت ومش باعرف ارد باقناع كده يبان طبيعى .. بصراحة عمرى ما جربت اكدب بالشكل ده قبل كده.. حمدت ربنا انها فى الآخر صدقت .. دخلت لبست بسرعة وأخدت حاجتى اللى كنت محضراها ونزلت ..

كل المحلات قافلة على الصبح .. ليه بس كده؟!! مشيت فى شارع طويل جنب بيتنا على أمل انى الاقى أى محل أدوات منزلية فاتح بس ملقتيش.. بعد ما يئست وكنت هارجع خلاص قلت طيب اكمل لحد الناصية اللى جاية ولو ملقيتش ارجع .. سبجان الله افاجأ بمحل منظفات فاتح .. دخلت وسألته.. عندك بخاخات مياة بلاستيك؟ قالى :آه ..
J

اشتريت حبة كده كتير ومشيت .. رجعت على الصيدلية وكنت محضره لسته بالأدوية .. دخلت وبدأت اطلب الحاجات من الصيدلى .. من كتر الطلبات ولأنى باطلبها بدون روشتة وبكميات الدكتور أخد باله.. سألنى: هوا ده عشان الناس اللى فى التحرير.. ترددت كده لأنى مكنتش عارفه موقفه ايه من الأحداث – الفترة دى كان من الصعب التكهن أو دخول حوارات مع البشر لأنك متعرفش مين هايطلع مؤيد ومين هايطلع معارض – قولتله بتحفظ: أيوة .. قالى: هوا ايه بقى اللى حصل عشان أنا معرفش؟؟ ابتسمت وحكيتله بسرعة فى كلمتين اللى حصل من يوم السبت ..
الدكتور كان متعاون بصراحة ادانى كل اللى عنده وحاسبنى ومشيت ..

عشان اوصل لمقر الحزب فى جاردن سيتى فى العادى كنت بانزل التحرير وأكمل بتاكسى .. منكرش انى كنت متخوفة من نزول الميدان لأول مرة فى خضم هذه الأحداث.. بالاضافة لأنى معاصرتش أيام الثورة الأولى فى مصر.. ونتيجة لتخويف البعض لى من أصدقائى – أو يمكن بسبب حرصهم الزائد – اقترحوا عليا اروح من طريق تانى .. نزلت فى محطة سعد زغلول ومشيت لحد الحزب .. فى الطريق اشتريت شوية عصائر زيادة ولبن وقلت أكيد الناس محتاجاهم هناك..

وصلت الحزب على الساعة 12 تقريبا بعد 5 دقايق وصلت د. مها وكان معاها للمفاجأة 5 أصدقاء كلهم بنات منهم أطباء زيها والبعض الآخر لأ.. كلهم جايبن كمامات ومواد طبية .. حضرنا محلول الميكوجيل ورتبنا الحاجات اللى معانا فى شنط وبدأنا نتحرك علشان ننزل.. قبل ما ننزل واحدة منهم اقترحت: على فكرة احنا مصليناش الضهر!! نصلى وبعدين ننزل.. بدأت القفشات .. آه عشان لو استشهدنا نبقى مصلين
J أخدت الموضوع بهزار معاهم وعلقت بقفشة .. الغريب انى بالفعل محستش أى احساس بالقلق أو الخوف أو فكرة انى ممكن اموت مثلا فى اليوم ده .. الحكايات اللى بدأنا نسمعها عن قتلى بأعداد كبيرة بالرغم من انها مؤلمة الا انه سبحان الله الواحد احيانا بيتخيل انها قد تكون بعيدة عنه ..
صلينا ونزلنا وأخدنا طريق الكورنيش واحنا فى الطريق بالصدفة قابلتنا عربية وقفت جنبنا.. لقيناها عربية بثينة كامل.. لما شافت الكمامات اللى كنا ماسكينها وقفت تورينا نوع تانى من الكمامات بيتباع فى شارع الجمهورية فى محلات الأمن الصناعى . قالتلنا دى أحسن عشان تمنع الغاز بشكل أفضل حاولوا تجيبوها وربنا يوفقكم ..
كملنا الطريق واحنا ماشيين اتصل حد بواحدة من البنات وقالها ان الناس فى الميدان محتاجين مواد غذائية لأن فيها نقص.. عدينا على سوبر ماركت واشترينا حاجات وبعدين كملنا لحد ما وصلنا لميدان التحرير من ناحية عمر مكرم.. لقينا المستشفى الميدانى الموجودة فى المسجد.. دخلنا جزء من الحاجات اللى معانا والأكل، دكتور متطوع من اللى موجودين قالنا فيه مستشفى تانية فى وسط الميدان محتاجة أكتر احنا هنا مكتفيين .. هاجى معاكم اوريهاكم.. اتفقنا اننا نعدى عليها نديها باقى الأدوية ونسيب الكمامات ومحلول الميكوجيل للناس اللى واقفين على خط النار فى شارع محمد محمود أكيد هيكونوا أكتر ناس محتاجينله.. واحنا ماشيين معاه طلعلنا صفيحة صغيرة كده معبى فيها كمبات من المطاطى اللى اتضرب عليهم فى الميدان .. د. مها صورته وقالنا انتوا هتلاقوا منه كتير فى الأرض..
المستشفى الميدانى فى وسط الميدان فى الصينية .. الشباب واقفين حواليها دايرة مشبكين ايديهم عشان يمنعوا حد يدخل غير الدكاترة والمصابين ، نسيت اقول ان واحنا عند عمر مكرم كان كمية سيارات اسعاف كتيرة جداً وشفنا فى الدقايق دى أكتر من مصاب وصل وواحد بيزعق فى الواقفين: لو سمحتوا يا جماعة اللى مالوش دور هنا يمشى عشان الزحمة ..
الولد اللى كان مصاحبنا دخلنا وسط الدايرة للمستشفى .. كان معايا شنطة اديتها لواحد من الدكاترة سألنى ايه ده؟ قلتله : على أسماء الأدوية اللى معايا .. أخد منى الشنطة بابتسامة وقالى شكراً.. خرجت من الدايرة ولفت نظرى صورة مصاب نايم على الآرض عنده اصابة شديدة فى وجهه واتنين من الدكاترة بيسعفوه ..

كنا محتاجين نتوجه للمتظاهرين المتكتلين فى أول شارع محمد محمود.. لقينا انه مش هينفع نخترق الزحام .. قولنا خلاص ندخل من شارع التحرير ونلف من الممر الواصل بين الشارعين واللى بالمناسبة فيه المستشفى الميدانى اللى ورا هارديز واللى كنا سمعنا انه اتضرب بالقنابل فى اليوم السابق بشكل بشع لأن كان عندى زميلتى دكتورة موجودة هناك ومن رحمة ربنا انها خرجت سليمة .. مستشفى عباد الرحمن دى عبارة عن مصلى أصلاً وسط 3 عمارات فى منطقة مربعة وليها مدخل واحد فقط.. الأمن الكلاب رموا المستشفى بالقنابل على المدخل ومنعوا أى حد يخرج طبعا الدخان ملا المكان بشكل عنيف والكل اتحبس جوا من دكاترة ومصابين لا عارفين يخرجوا ولا عارفين يتنفسوا .. زميلتى كانت خرجت بأعجوبة وكنا ليلتها بنحاول كلنا نكلمها لما سمعنا بالخبر والمرة اللى ردت فيها عليا قالتلى كلمتين وهيا بتعيط: أنا خرجت .. هاقفل دلوقتى .

المهم مشينا فى الشارع وبدأنا نحس بتأثير الغاز الفظيع جدا على عيونا وأنوفنا .. عينيا بدأت تدمع بشكل غزير ورشح قوى جداً من الأنف .. بدأنا نرش على وجوهنا من محلول الميكوجيل .. الناس لما شافت معانا كمامات استسمحونا اننا نديهم منها .. بدأنا نوزع الكمامات على الناس لحد ما وصلنا لمكان المستشفى .. المكان كان فاضى تماما.. حاولت اتخيل المنظر كان عامل ازاى قبل ما يتضرب .. المهم اننا سلمنا الحاجات اللى كانت معانا للناس وبعدين خرجنا من المنطقة بسرعة .. الغاز بصراحة كان صعب جداً .. مش قادرة اتخيل امال اللى بيكونوا فى مواجهته اول ما يتضرب بيبقى عامل ازاى ؟!!

رجعنا لمنتصف الميدان وبعدين زمايلى اللى معايا قرروا يمشوا .. قولنا نعدى على مستشفى عمر مكرم نسألهم اذا كانوا محتاجين حاجة تانية نبقى نجيبهالهم تانى .. فى وسط الميدان وقفت وحاولت ألقى نظرة سريعة على المكان كله.. منظر الناس المنتشرة فى المكان مع صوت الضرب مع رائحة الغاز مع شكل الأرواب البيضاء للدكاترة والمصابين خلانى أحس احساس غريب.. حاولت ارجع بذهنى لصورة الميدان فى أحواله الطبيعية حسيت ان الصورة بعيدة اوى على التخيل ..
رجعنا لعمر مكرم وأحد زميلاتنا دخلت تسأل الدكاترة بالداخل عن اللى هما محتاجينه .. وقفنا بره وأثناء وقفتنا تقدم مننا رجل كبير فى السن .. قعد يتكلم معانا عن اجرام المجلس العسكرى وعن ضرورة رحيله .. عجبنى ان الراجل بيقول كلام بسيط بس واضح جداً بلا لبس أو رغى كتير.. حسيت قد ايه الناس البسيطة دى بتعرف تلخص المواضيع فى كلمتبن أحسن من ديباجة مليون واحد من اللى بيطلعوا فى التلفزيونات وقرفينا ليل نهار..
زميلتنا لأنها دكتورة قررت تبقى مع المستشفى واحنا كلنا كنا هانمشى .. حسيت انى مش عايزة اروح بالرغم من انى عارفه انا ماما أكيد هتكلمنى وانا قلتلها على مشوار مياخدش ساعتين ومكنتش عارفه حجة تانية اقولهالها.. بالرغم من كده قررت انى اطلع على الحزب تانى واستنى هناك شوية .. استنى ايه مش عارفه بس رحت .. واحنا فى الطريق قابلتنا مسيرة كان باين عليهم من شباب جامعة القاهرة جايين من ناحية القصر العينى.. ابتسمنا لرؤياهم وهما ماشيين يهتفوا فى الشارع متوجهين للميدان

لما وصلت الحزب دخلت على النت وبعدين فكرت ابعت على جروب الحزب لزمايلى انى موجودة فى الحزب ولأنه قريب من الميدان فلو حد محتاج حاجة هناك يبلغنى .. بدأت الطلبات تتوافد لحد ما كلمنى زميل ليا اسمه أحمد سامح.. قالى انهم فى المستشفى عندهم نقص جامد فى أدوات الجراحة وطلب منى حاجات معينة خيوط وحاجات تانية .. أخدت منه الطلبات ودونتها ونزلت .. قلت اروح على منطقة القصر العينى فيها محلات كتير أدوات طبية متخصصة لأن الحاجات دى مش هلاقيها فى الصيدليات العادية .. مشيت لهناك ودخلت اول محل صادفنى .. طلبت منهم الحاجات .. كان واضح طبعا انى باطلبها للميدان وهما غالباً كانوا متعودين أو متوقعين فمحدش علق وفهمونى على طول وكانوا متعاونين جداً وبيحاولوا يفهمونى أسماء الحاجات اللى انا كاتباها ومش فاهمة معناها.. مثلا يقولى دى عبارة عن مشارط والاسم ده معناه مقصات شريان وحاجات كده
J

بعد ما جمعت الحاجات وابتدوا يحسبوا تمنها اكتشفت انها غالية وخصوصا خيوط الجراحة والفلوس اللى كانت معايا مكانتش هتكفى .. فكرت اروح اسحب من آيه تى ام قريبة بس مكانش فيه .. الولد اللى واقف قالى شوفى أكتر حاجة محتاجاها ايه وانا هاعملك خصم J سعدت بالفكرة طبعا واتصلت بأحمد اسأله عن أكتر الحاجات اللى محتاجينها وبلغت بيها الولد.. حسبلى الحاجات وعملى الخصم واديته الفلوس وخرجت وجوايا احساس بالانتشاء .. مفاتنيش القط منظر الصليب اللى كان منقوش على ايده الشمال ..
وصلت الميدان تانى والجميل انى فى الطريق قابلت بنات تانيين ماشيين فى نفس الاتجاه للميدان وكل واحدة فيهم شايلة شنطة أدوية وأدوات
J الناس فى الشارع كانوا بيبصوا علينا ولسان حالهم عارف طبعا احنا رايحين فين.. أول ما وصلت كلمت أحمد قلتله أنا ناحية عمر مكرم .. قالى طيب انا جايلك. استنينى عندك.. وقفت استنيته لحد ما جه وكان معاه زميل تانى من الحزب ومعاهم بنت أول مرة أشوفها .. أخد منى الحاجات وبعدين كان معاه جرنان مكتوب على الهامش بتاعه أسماء أدوية وحاجات تانية.. ادانى الجرنان وقالى: بصى دى لسته أدوية تانية محتاجينها والدكاترة ادونا اساميها .. هاجر هنا صحفية زميلتنا روحى معاها هيا عارفه مكان هتجيب منه الحاجات دى. قلتله اوك وسلمت على هاجر ومشينا احنا الاتنين خارجين تانى من الميدان .. فهمت من هاجر انها صحفية فى جريدة التحريرفى قسم الاسلام السياسى وانها وزملاء ليها مجمعين فلوس هيشتروا بيها الأدوية وانهم هيجيبوها من محل فى السيدة زينب لأنهم اتعاملوا معاه قبل كده وبيساعدهم وبيدهم خصم كبير لأن صاحبه متعاطف مع الثورة .. هاجر بنوتة رقيقة وعسولة وبالرغم من ده شجاعة جداً فهمت منها انها بتطلع على خط النار كتير عشان تساعد باللى تقدر عليه. طلعنا على شارع الكورنيش وأخدنا تاكسى من هناك.. طبعا واحنا راكبين كنا بنتكلم فى الأحداث واللى بيحصل.. فى وسط الكلام لقيت هاجر بتقولى: أصلاً أنا دراعى الشمال واجعنى جداً ومش عارفه أحركه .. أخدت خبطة جامدة فيه نتيجة تدافع الناس وقت الضرب .. لاحظت أنا انها كانت طول الوقت تانية دراعها فعلاً.. قلتلها وفى ذهنى بتدور صورة صفا زميلتنا فى الحزب الثورية العظيمة اللى كان دراعها الشمال حصل فيه شرخ نتيجة لأن مجموعة من عساكر الشرطة العسكرية اتلموا عليها وضربوها بالشوم http://safaharak.blogspot.com/2011/11/tahrir-nov20.html:

يابنتى كده غلط لازم تروحى مستشفى تكشفى عليه لا يكون فيه شرخ أو كسر.. كانت رافضة وبتقول انها حاجة بسيطة ومش مستاهلة لكنى اصريت قلتلها ننزل عند القصر العينى قبل ما نكمل لحد السيدة زينب بس هيا برضه أصرت عشان منتأخرش على الناس فى الميدان .. قلتلها: خلاص نوصل ونقابل زمايلك واحنا راجعين حد يروح معاكى وحد ياخد الحاجة على التحرير ..
لما وصلنا وجينا نحاسب التاكسى اكتشفنا انه مكانش راضى ياخد مننا فلوس .. تقريباً سمعنا واحنا بنتكلم وبدافع وطنى بداخله شعر انه من العيب انه يحاسبنا.. أو أنا حسيت كده بس احنا فى الآخر اصرينا واديناه حسابه.
نزلنا وقابلنا أصحابها ورحت معاهم على المكان اللى هنشترى منهم .. عرفت ان كل زملائها هما صحفيات فى جريدة التحرير .. واحنا داخل المحل بنشترى دخل واحد عرفنا فبما بعد انه دكتور عيون .. لما أخد باله اننا بناخد حاجات للتحرير تقدم مننا وعرفنا بنفسه وعرض خدماته.. وقال انه مستعد لأى عمليات جراحية مجانية لأى مصابين وادانا نمرة تليفونه وعنوانه كان فى نفس العمارة وقالنا انشروا النمرة .. قلناله هنسيبها مع الدكاترة فى الميدان عشان يبعتولك أى حالة محتاجة لتدخل جراحى ..

د. عبد القادر عبد الحميد

طبيب عيون – مستلزمات عمليات

تليفون: 01221020200

خرجنا وهاجر رفضت انها تروح المستشفى تكشف برضه واكتفت بانها أخدت حبيتين مسكن ، وركبنا مرة تانية للتحرير .. سواق التاكسى المرة دى كان باين عليه ثورة ومتحمس للثورة. قالنا المفروض منمشيش من التحرير الا لما المجلس العسكرى يمشى
J
- مش أول مرة أقابل سواقين تاكسى مؤمنين بالفكرة دى - لما وصلنا كلمت احمد سامح تانى وجالنا وأخد مننا الشنط.. اتوزعنا على المستشفيات عشان نسلمهم الحاجات وأنا سيبتهم كلهم ورحت مع أحمد سامح.. قالى هاوصلك لباقى زمايلنا اللى هنا دلوقتى وأروح انا اوصل باقى الحاجات.. مشيت معاه لحد ما وصلت وفوجئت بكم كبير من زمايلنا بالحزب موجودين.. حسيت انى لقيت أهلى فى الميدان بصراحة .. وقفت معاهم وفضلنا متواجدين لحد الساعة 9:30 مساء تقريباً .. مكنتش ساعتها عايزة امشى بس كنت لازم اروح لأن ماما اتصلت بيا كتير وكل مرة كنت بالاقيلها حجة شكل .. موبايلى كان فصل شحن فعلياُ كمان وقلت لو حاولت تكلمنى ولقته مقفول هتنزعج أكتر.. سلمت على زمايلى وواحد منهم جه معايا يوصلنى للمترو لأن كان فيه تخوف من ان بداخل المحطة يكون فيه عناصر أمن أو جيش بتعتقل الناس زى ما حصل فى اليوم اللى قبله.. روحت على أمل انى انزل تانى يوم المليونية وأنا بافكر فى الحجة الجديدة اللى هاقولها لماما تانى يوم ...

No comments: