لمة أصحاب بحبهم أوى نقعد مع بعض ونضحك بصوت عالى
اقعد فى مكان واسع أخضر كبير مليان ورد وشجر وصوت مية
أشغل أغانى بصوت عالى واقعد اتنطط وارقص واغنى معاها لوحدى
تورتة بلاك فورست كبيرة واكلها لوحدى برده
اسافر وألف العالم وأشوف أماكن كتير مرحتهاش قبل كده
بابا يكون معايا دلوقت ... عندى كلام كتير عايزة اقولهوله ... بابا وحشتنى
الشتا ييجى بقى ويبقى فيه برد ومطر ورعد والبس هدوم تقيلة وأنام تحت البطاطين
حد يجيبلى هدية حلوة وتكون مفاجئة
أسافر فى عربية مشوار طويل بالليل وأركن راسى على الكرسى وأغمض عينى وأسمع منير
أرجع ألعب كمانجة تانى وأبقى شاطرة أوى وأعرف أعزف كل الألحان اللى بحبها
أغير الكارير بتاعى وأشتغل مؤلفة ومصممة أفلام كارتون
يكون عندى المكتب بتاعى أفرشه على ذوقى و يكون فيه مكتبة كبيرة لكتبى وأحط فيه صور أصحابى والناس اللى بحبهم
أفضل أقرا كتير كتير واكتب على طول على طول
أحضر حفلة لايف ليوركا ومنير ووجيه عزيز
No comments:
Post a Comment