البتاع ده اللى اسمه الحب

هوا الكلمة الجميلة الوحيدة فى حياتنا اللى بيتلخص فيها حريتنا ومشاعرنا واختيارنا وشخصيتنا

وهوا احتياج... احتياج للأمان والاحساس بالسكينة وانك موضع اهتمام من الطرف الآخر

وهوا كان موضوع حوار دار بينى وبين مجموعة أصدقاء... ايه هوا الحب وازاى كل واحد بيشوفه وبيعبر عنه وكانت الآراء:

- فيه حد بيعتبر الحب ضعف ، وبيعتبر اعلانه عن حبه اعلان عن تنازله لكبرياؤه وشخصيته وبما ان الانسان حريص بطبعه على اخفاء ضعفه فهو بيحاول ينكر وجود الحب فى حياته.

رأيى انه خسر كتير ، خسر لمحاولة تجاهل الشعور الوحيد الحقيقى والصادق فى حياته، ولأن الحب قوة مش ضعف، قوة بيخلقها الشعور بالأهمية والثقة بالنفس والرغبة فى التفانى.

- فيه حد بيخاف من الحب ، لأنه بيتصور ان الحب مرتبط بتقييد الحرية وشيل المسؤلية

رأيى ان الحب حرية ، حرية بتيجى من الشعور بالانطلاق ومن وجود شخص جنبك بيشاركك أهم لحظات حياتك وبيهتم بيك وبيسعى لتحقيق سعادتك وبيخاف عليك. والحب حرية حينما لا يسعى أحد الطرفين الى امتلاك الآخر.

- فيه حد بيصور له ذكاؤه انه ممكن يعيش حياته كلها من غير ما يحتاج لحد وانه مش محتاج للحب.

رأيى انه بيناقض نفسه لأن الاحتياج طبيعة محدش يقدر يهرب منها للأبد

- فيه حد بيفتكر ان الحب تملك وانه بحبه لشخص تانى أصبح بيملك كل الصلاحيات للتحكم فيه.

رأيى ان ده كره مش حب لأن الحب بالصورة دى بيخلق نوع من القسوة والقلق والخوف، والحب مش محاولة متبادلة للاحتكار. أنت لما بتحب شخص فأنت بالضرورة بتثق فيه وفى الحالة دى مفيش اى دافع مبرر لحب الأثرة والسيطرة.

امتى بيعرف الانسان انه بيحب؟

لما يلاقى نفسه دائم التفكير فى اللى بيحبه، لما يحس انه مستعد يقدم اى شىء عشان يسعد اللى بيحبه ولما يبقى نفسه يشاركه كل لحظات حياته بكل ما فيها من فرح وحزن

ايه أسباب الحب؟

الحب مالوش أسباب محددة أو منطقية ، كل الأشياء قد تكون سبباً للحب وفى مواقف أخرى قد تكون سبباً للكراهية .أنت بتحب عشان بتحب ، كده بكل بساطة.

حبيبى حتى وان صار الحب أملاً

سأقرأ فى عينيك كل الحروف...

سأجتاز نحوك كل الخطايا

كل العوائق

كل الصفوف...