تخيّل

لما كنت فى حياتى كنت بسأل نفسى سؤال واحد

ياترى بحبه بحقيقى؟

يا ترى هو بيحبنى؟

من ساعة ما مشيت ورحيلك اختصر المسافات...

حسم كل الاحتمالات...

وسابنى قدام اجابة واضحة محددة لا تقبل مناقشة أو جدل...

وحطنى قدام سؤال جديد لسه بدورله على اجابة..

ياترى هانسى ؟...

يا ترى هيفتكرنى؟...

حيرتى وانا وياك.. وحيرتى وانا من غيرك..

فى حضورك كنت باناشد الذكرى عشان مانساش..

دلوقتى حاسة انى نسيت ازاى كنت بفتكرك..

حتى الذكرى فى غيابك صبحت عبء.. الوانها مطفيّة وملامحها باهتانة...

حتى الحلم فى غيابك اصبح عنيد.. فقد كل المعانى للدهشة والأمل...

عايز تعرف كنت عامل فيّا ايه وانت معايا ؟

تخّيل...

تخيّل احساس الفرحة بس لما اسمع صوتك... لما اشوف ضحكتك..

تخيّل احساس الأمان بس لما افتكر انك موجود.. انى لما احتاجك هالاقيك..

تخيّل احساس الحب لما احس بخوفك عليّا.. باحتياجك ليّا...

تخيل احساس الأمل اللى كنت باصحى عليه كل يوم..

عايز تعرف عملت فيّا ايه لما سبتنى؟

تخيّل..

تخيّل احساس الألم اللى عايشاه من غيرك..

حلم اتخلق ومات قبل ما يكتمل...

روح اطمنت تسكن بين ايديك..

ايقاع قلب اتعود على مشاعرك..

شهوة جسد اشتاق للمستك..

تاهت كل المعانى الحلوة اللى كانت عايشة بوجودك..

وتاهت منى حروف الكلام..

وايه جدوى الوصف والتعبير لو ناقصه الهامك..

وايه معنى الكلام لو مكنتش هتقراه...

http://www.youtube.com/watch?v=mWW3zQttNsc