فى الحلم علمنى

النهاردة الصبح صحيت وانت على بالى... كنت فاكرة انى نسيتك.. أو بالتحديد نسيت الحالة اللى بحسها وأنا معاك.. مستغربة أكتر انى الاقى نفسى مشتاقلها ورجعت تنبض جوايا بنفس القوة والتأثير.. حاجة جوايا بتسترد الذاكرة وبتصحى وبتعيش على اسمك وصورتك.. حاجة بتصرخ فيا نفسى اشوفك اكلمك واحكيلك.. جوايا كلام كتير مخنوق وعايزاه يطلع

(كان نفسى اناديلك احكيلك .. اسمع منك ابكيلك)

عايزة اشكرك انك علمتنى كتير.. علمتنى انى معديش حاجة بتحصل من غير ما افكر فيها واحدد موقفى تجاهها..

علمتنى ان فيه اولويات ومبادئ احيانا بنتصور انها راسخة جوانا لكن بتيجى اللحظة اللى بنحتاج نثبت فيها التزامنا .. نخليها قدام عينينا ونفتش عليها جوانا عشان نصدق اننا صح..

علمتنى حب المغامرة والاكتشاف .. زمان كنت فاكرة انى مش بخاف.. بس بعد ما عرفتك عرفت ان الشجاعة ارادة وحكمة مش مجرد تهور أو محاولة لاثبات الذات..

عايزة اقولك ان يمكن فيّا حاجات كتير مش عاجباك لكن نفسى تقبلنى زى مانا .. لأنك زى ما علمتنى حاجات غيرت فى شخصيتى علمتنى انى احاول اكون نفسى.. صحيح هابقى سعيدة ومبسوطة انى اقرب منك واحس انك راضى عنى لكن هاكون أسعد لو قررت انك تبعد وانت بتحترمنى.. وانت شايفنى كيان واحد مش هايحس بالراحة والسكينة الا لما يكون شبه نفسه مش شبه حد تانى..

(لو كان لزاماً علينا الرحيل كارهك ياوداع ولا بديل)

عايزة اقولك انى عارفه انك خايف منى.. خايف من أحلامى ومش مرتاح لنظرة الحزن اللى فى عينيا.. عايزة أقولك ان الحلم مش عيب ونظرة الحزن فى عينيا مش كآبة.. دى وحدة..

لأنى كنت لوحدى اتعودت انى افكر طول الوقت.. اتعلمت انى اعتمد على نفسى.. اتعلمت اخطط لبكرة واحسبها كتير.. لكن اللى عايزاك تعرفه ان مش كل أحلامى قاسية .. ان فى عز اعتزازى باستقلاليتى باحلم بلحظة ضعف بين ايديك.. لحظة اتخلى فيها عن كل أوجاع الدنيا وكل طموحات البشر .. لحظة ما يوصلنى منك احساس الثقة وتقرر انك تكون جنبى..

(يا لون ربيع وردى الحزن مش قصدى أنا فرحى شوف قدى طارح نهار)

النهاردة بالذات عايزة اقولك انى محتاجاك.. محتاجة احط راسى على كتفك واغمض عينى وانام.. محتاجة اقعد اتكلم معاك كتير كتير لغاية ما نفسى يتقطع.. محتاجة اننا نختلف وتزعل منى عشان فى الآخر بس اقولك حاضر من غير مناقشة ولا حوار.. محتاجة انك تحكيلى عن نفسك وتطلع كل اللى جواك وانا سامعاك وحاضنة كفك بين ايديا.. محتاجاك تساعدنى اضحك كل ما عينيا تدمع ومن بين دموعى ابصلك واحس بالأمان.. بالانتماء للأرض اللى بتجمعنا سوا وارتاح..

(فى الحلم علمنى تبقى قريب منى قلبك يطمنى قربك نهار)

http://new.mawaly.com/music/Mohamed+Mouner/track/317