احساس وجع

أنا قاعده اهو فى نفس المكان وعلى نفس الترابيزة اللى اتعودنا نقعد عليها زمان. باكل الآيس كريم بالفواكه اللى انت بتحبه.. مستمتعه بطعمه الساقع وهوا بيسيح جوايا وبيفوّر كل مشاعرى وذكرياتى ناحيتك فى اليوم الحر ده. فاكر لما كنت دايماً بتقولى أنا بحب آكل الآيس كريم فى الصيف أكتر وأنا أقولك أنا بحبه أكتر فى الشتا.. اتحاد برودة الآيس كريم مع برودة الشتا بيدينى احساس بالتكاتف. صحيح انه بضدها تتميز الأشياء بس أنا عندى بحب أربط بين الأشياء واحس انها بتدّعم بعضها حتى فى البرودة

اخترت اليوم ده عشان دا ذكرى وفاة بابا .. مش عارفه ليه من ساعة ما سيبتنى وأنا بحب آجى هنا يوم ذكرى وفاته .. يمكن عشان ده بيفكرنى بحالة الندم الفظيعة اللى أنا عايشاها من ساعة ما مات. ندم انى ماكنتش جنبه لحظة وفاته.. ندم انى معرفتوش كويس.. ندم انى ملحقتش أقوله بحبك. كنت فاكره ان شعورى ده خاص ومتفرد لغاية ما قريت جملة فى رواية بتقول:

( أشعر بالذنب تجاه أبى لأنه رحل.. احياناً ما يداهمنى الشعور اننى لم أعرف أبى بما يكفى، اتساءل فجأة ما الذى كان يفعله أبى فى هذا الموقف وماذا كان يقول فى ذلك الشأن. حين يفاجئنى هذا الشعور ارتبك )

الجملة دى جت على الوجيعة. فاكر لما قرتهالك قولتلى متخافيش أنا جنبك.. ومن ساعتها سبت احساسى بالندم يروح وييجى لوحده ماكنتش باستدعيه زى زمان

عارف ..من يومين نزلت على كورنيش النيل الصبح فى الشمس فى نفس المكان اللى قابلتك فيه بعد ما رجعت من السفر. أخدت معايا بالونات كتير ملونة وطيرتها فى الهوا.. كنت عايزة أمحى آخر ذكرى سيبتهالى فى اليوم المطر ده لما مديت ايدك تسلّم عليا وانت بتنده باسمى ولمحت الدبلة الفضة بتلمع فى ايدك اليمين.. سيبتك ومشيت ومن ساعتها وأنا خايفة ارجع لنفس المكان

لما افتكرت الموقف ده رجعت بالذاكرة لآخر مرة شفتك فيها قبل ما تسافر.. لما قعدت تحكيلى عن طموحك فى فرصة السفر دى بالنسبة لشغلك وانه ازاى هايشبع عندك رغبتك فى الانتاج .. ساعتها احترمتك لما حسيت انك راجل بجد بيخطط للى هوا عايزه على أسس واقعية قابلة للتنفيذ مش شطحات أحلام ولا جرى ورا مصلحة ومناصب.. بالرغم من حزنى انك هاتغيب عنى لكن كان جوايا احساس السعادة بحبيبة شايفه بريق الحماس وملامح الفرحة الطفولية فى وش حبيبها بحلم قرب يتحقق.. سيبتك تسافر فى هدوء وكنت عارفه انك راجع.. ولتانى مرة باندم على كلمة بحبك بس المرة دى على انى قولتها

دلوقت أنا قررت انى لازم اتعود على احساسى بالوجع.. هاعمل كل الحاجات اللى كنت بتحبها وهاسيب بابا يجيلى فى الحلم كل ما يحب