بحب البحر ... بحب الورد .. بحب الناس .. بحبك

بحب البحر لمّا يزوم..
و أعشق صرخته في الريح ..
بحس في موجه شوق مكتوم..
لناس حُرّة و حياة بصحيح ..

و أحبّه لمّا يتهادي ..
و أدوب لمّا يوشوشني ..
و يفرش موجه سجادة..
في أحلامي تعيشني ..

ملوش أول..ملوش أخر ..
قراره طاوي اسراره ..
و دايماً في الهوي مسافر..
ولا نهاية لمشواره ..

بحب البحر..أحب البحر..
و أعشق ضحكته و آنه ..
و أحب الناس..أحب الناس..
ماهم فيهم حاجات منه ..

و أحبك يا اللّي أحلامي..
في هواكي زهزهوا و حنّوا ..
يا بلدي ياللّي و أنا فيكي ..
عيوني ليكي بيحنّوا ..

بحب الورد فوق السور ..
و أعشق ضحكته الفانية ..
و أحس في ريحته شوق مسحور ..
لناس حرّة و حياة تانية ..

و أحبه بين ايدين عشاقْ..
رسالة مهفهفة بأشواقْ ..
و حتي و هو بلا أوراقْ ..
كتاب العشق ، ذكرى فراقْ ..

حياته في الهوي ليلتين..
و عمره ما كان بعمره ضنين ..
يرش هواه علي الماشيين..
و يتقاسمه مع الجايين ..
بحب الورد ..