Sole Music

Friday, October 28, 2011

فى الوقت بدل من الضايع

وكان دايمًا لما باشوفه ألاقيه مبتسم وعلى طول بيضحك... بيحب يضحك اللي حواليه ويفضل يناغش فيهم ويعاكسهم لحد ما يسمع الضحكة طالعة مجلجلة... مش بس الابتسامة
وكنت بأفضل مراقباه والابتسامة على وشي، وأفضل مستمتعة جدًا بفكرة تكهُن الخطوة اللي جاية.. وأول ما حدسي يطلع صح، تزيد الابتسامة
مع الوقت دقة التوقعات زادت، بقيت خايفة إن لو كل ردود الأفعال اتعرفت وكل الكلمات اتقالت الدهشة هتقل والبسمة هتروح...
ولما بدأ قلقي شوية بشوية يطغى على تركيزي، كانت أول مرة يجي ويكلمني

قالي: على فكرة كنت بأحب شكلهم أوي..
بصيتله باستغراب وقلتله: هما إيه؟!!
قالي: سنانك...لما كنتي بتضحكي كانوا بينوروا الدنيا..

محستش بنفسي غير وأنا باضحك بجد... باضحك من قلبي
-----------------

عارفه .. لسه فيه حاجات فى الحياة صعب الواحد يتوقعها .. الله يرحمه ..

---------------------


Sunday, October 2, 2011

واحشانى

حاجات كتير واحشانى

أولها انى ادخل فى المكان ده واكتب فيه

لما تلقى نفسك بقيت حد تانى غير نفسك وتستغربك

تقف وتتأمل كل اللى فات وتقول ياااااااه كل ده حصل امتى وازاى.. وليه

بتخليك تسأل نفسك انا مين فيهم؟ أنا اللى كنته زمان والا اللى بقيته دلوقتى؟

من لحظات شجن كتير بتعدى على الواحد ... مرجيحة أمل ويأس

يأس مضطر يواجهه، وأمل مش عارف يعمل حاجة غير انه يتمسك بيه

باحن كتير للحظات زمان ،، وأوقات زمان

ليه كل اللى جاى بيكون أصعب ؟؟

حاجات كتير واحشانى ،، أولها فستان أبيض صغير بكرانيش

وأرض خضرا وواسعة

وضمه ايد بتحضن ايدك وتطبطب عليها

وحلم جميل من ضمن أحلام كتير بتقع منك تتبعتر حواليك

مش بمزاجك.. أو حتى بخاطرك بتركنهم على جنب

وتفضل ماشى تسيب فى أحلام، وتتنازل عن أحلام، وتضيع فى أحلام،

المشكلة بقى انك لسه بتفضل تحلم ...